"سائق التاكسي"

"اِركب يا باشا.. ممكن سجارة والنبي عشان خرمان يا صاحبي، وهوا الفجر بيفتـَّح الصدر.. ألف شكر يا باشا.. هسسسسسسسس.. أول نفس يدخل صدري م الصبح. ماتفتكرش يا باشا إني كفحتي ولا حاجة لا سمح الله! أنا الطبيعي بتاعي بجيب بالعلبتين وبالتلاتة مرلبورو في اليوم.. بس الحالة كرب اليومين دول معايا.. قولتلي عايز تروح فين؟ عنيا يا باشا، حلوة الزتون.. أنا فيه أماكن لو اتدفعلي فيها مليون جنيه ماروحها أبداً.. زي ايه؟ زي إمبابة مثلاً.. عيال كلها ضريبة وبلطجية، ومليانة تكاتك.. أنا اتثبتّ هناك مرة بمطوة بس وقتها كنت محشش لما عميان فقلت للواد: المطوة ديه تحطها في كس أمك يا خول، انزل هنا قبل ما آخدها منك أقطعك بيها! الواد كان كله عضلات بس خاف وجري زي الأرنب.. مستغرب يا باشا؟ والله انت ابن حلال.. دَ أنا ياما اتثبتّ! وكل التثبيتات كانت بعد الثورة النجسة ديا.. أوسخ موقف حصل معايا لما كنت بوصـَّل 2 زباين محترمين كدة مايتخيروش عنك لقليوب.. وعند الترعة السكيتي قالولي وقـَّف! واحد طلـِع بـِ فرد من جيبه والتاني بـِ سنجة.. هووووب رحت طفيت العربية والمفاتيح في ايدي، قمت فاتح الباب بسرعة وجريت.. خدت لطشة سنجة في ضهري من الواد ابن الحرام اللي ورا، بس بسيطة زي بنتي الوحيدة زيزي -ربنا يباركلي فيها- مابتخربشني.. أروح أشخط في أم زينب عشان سايباها، ضوافرها كبيرة.. هي كبيرة مش صغيرة.. بس مخها بعافية حبتين.. قضا ربنا! الحمدلله على أي حال.. المهم يا باشا، أنا ماحستش برجلي وأنا بجري وسط الزرع والحتة ضلمة ومافهاش صريخ ابن يومين.. هوووووب ألاقي نفسي سقطت في الترعة.. الريحة كانت نجسة زي لامؤاخذة يا باشا كدة لما تنزل في كبانيه بعد ما واحد عمل إسهال ومشدش السافون.. استنيت شوية تحت الخرا وأنا قافل مناخيري بإيدي.. وايدي التانية متبت بيها ع المفاتيح.. لغاية ما حسيت إني هتخنق والدنيا آمان برة.. قمت طلعت، كانوا جريوا.. قلت الحمدلله طلعوا عيال خام ماعرفوش يدوروها بالأسلاك، هم بس لهفوا 33 جنيه كنت حاططهم في العلبة ديه، قلت بسيطة لكن على جثتي إنهم ياخدوا التاكس.. كان فيه كيس حاطط فيه ترنج، غيرت هدومي وطلعت ع البيت.. أم زينب قالتلي بيع التاكس وافتح كشك سجاير أأمن.. بس برضه المنظر يا بيه.. إش جاب سواق تاكس بيلف الشوارع لواحد متمسمر في مكانه؟ وصاحبك كمان بيتخنق بسرعة.. بعد كدة وفي نفس الأسبوع.. واحد من السواقين زمايلنا مارضيش يدي التاكس لاتنين بلطجية فضربوه بخرطوش بلي في صدره راح المستشفى، والتاكس راح منه.. ده حتى مش بتاعه، هو شغال عليه.. صاحب التاكس بقى رفع عليه قضية، بيقول إنه مالوش دعوة وعايز عربيته.. لما رحت أزوره في المستشفى قلتله تعالى نشتغل بلطجية بعد ما تقوم بالسلامة لغاية ما نجيب حقنا ونبطل، قعد يضحك لما كح دم.. وفي نفس الأسبوع يا باشا.. آه والمصحف زي ما بقولك.. واحد صاحبنا تاني ثبتوه وخدوا عربيته وخدوا كمان رقم موبايله عشان يكلموه.. تجيب 15 ألف جنيه نديك التاكس.. مراته باعت صيغتها واستلف من طوب الأرض وجاب الفلوس، وراح قابلهم في نوة ع الطريق، خدوه على فسبا بعد ما خدوا منه الفلوس وغموله عينيه ولبسوه الخوذة لغاية ما سابوه مع عربيته.. وهو راجع بيها بقى.. وقفته لجنة، راح حكالهم الحدوتة.. تخيل الظابط ابن الوسخة قاله ايه؟؟ مش عربيتك رجعتلك بالسلامة، ماتنساش بقى تربط الحزام!! آهو من كل اللي بيحصل ده كبرت في دماغي فـَ رحت بالقرشين اللي محوشهم جبت طبنجة بـ 14 باكو وعلقتها في باب العربية.. بعد أسبوع.. لجنة وقفتني وفتشوني، الظابط قالي أنا عشان محترم بس هاخد الطبنجة ومش هعملك محضر قلتله يا باشا ديه بالشيء الفلاني، وانتو لا بتدافعوا عننا ولا عايزنا ندافع عن نفسنا ؟؟ فمسكني من قميصي، انت شكلك لبط يلا.. اركن على جمب.. رحت قلتله حقك عليا يا باشا أنا ابن وسخة، أصلاً أمي ميتة فـَ مش هيفرق لما أقول عليها وسخة وهي أكيد ماترضاش لابنها بالبهدلة.. كبرت في دماغي بقى إني أسرق م الزباين.. فيه زرار هنا يا باشا سياحي، أيوة ده اللي ع اليمين.. ده لو دوست عليه بيضاعف الأجرة.. قمت معلق في المراية اسكارف مدلدل قدام العداد عشان الزبون مايخدش باله لما يجري.. أنا بقولك الكلام ده عشان أوعيك يا باشا، بص كدة ع العداد هتلاقيه ماشي بحق ربنا.. المهم يا باشا أول زبون طلعت معاه لقيته محترم أوي وحاطط بارفان غالي قلت مش هيفرق معاه بقى.. لقيته بيرفع السكارف وبيبص ع العداد وبيقولي انت حرامي!! أنا اتلجمت يا باشا لأني ماليش في الكدب.. قالي ده لسة ماكملش كيلو والطريق مافهوش وقوف والعداد عدى الـ 2.5! قعدت أسرح بيه لقيته بيقولي أنا هوديك القسم.. رحت موصله لغاية مكانه وماخدتش منه ولا مليم وقلت مش هكررها تاني ومن بعدها بقيت ماشي بما يرضي الله. بتسألني هدي صوتي لمين في الانتخابات؟؟ يا باشا أنا صوتي رايح أصلاً، مرة ركب معايا واحد م اللي بيشجعوا أبواسماعيل.. أول ما ركب -وأنا حافظ أشكالهم- قلتله وحياة أبوك وأمك يا شيخ ما تلزق صورة ع العربية.. قعد بقى يخوتني بيه وأنا مستذوق معاه، مش عايز أشخرله.. بس أخر ما راسي ورمت رحت قايله أنا أصلاً كافر ومابركعهاش! وراسي ورمت من كلامك.. هتسكت ولا أنزلك هنا؟؟ برضك واحد تاني ركب معايا زي العيال اللي بيطلعوا في النشرة دول، ابن الوسخة قعد يفتقلي دماغي وانت لازم تنتخب وتشارك في البتنجان قلتله يا باشا يا متعلم أنا راجل بسيط على قد حالي بس لما أنا مانتخبش ايه اللي هيحصل؟؟ صوتي هيحل مشاكل البلد؟؟ يقوم ابن المرة الزانية يقول ماهو لو كله فكـَّر بالشكل ده هتبقى مشكلة.. رحت جحرتله بعنيا كدة آه والله زي ما بقولك يا باشا وقلتله انت مابتفهمش الكلام ولا مش بتسمع ؟؟ أنا بقولك إن صوتي مش فارق.. لو هيفرق قولي ازاي وماتشتغلش بقى تقولي لو كله قال وعاد.. أنا بكلمك عن نفسي! قعد بقى يرطن بكلام عن قيمة نفسك ومثل أعلى لعيالك مثل أعلى ازاي إذا كانت بتي مخها مع اللي خالقها.. لقيته زنان فقلتله حاضر هبقى انتخب بصوتين كمان لو ينفع.. عايز تنزل على جمب هنا؟ عينيا يا باشا.. معلش لو كلت دماغك.. ما تخلي يا باشا.. والله ماتخلي بجد.. والنبي بس قبل ما تمشي أنا عايز أقولك إني شغال رغي وبترقص وأنا بتكلم عشان أبينلك إني بضرب برشام، عشان مافيش حد ممكن يسرق مبرشم لأنك ماتعرفش ممكن يرد عليك بإيه! بس وحياة زيزي أنا مش ضارب.. انت شكلك محترم وكل حاجة بس ياما ناس كان شكلها محترم ثبتتني واللي خوفني أكتر إنك كنت ماسك مادلية المفاتيح في ايدك زي ما تكون هترزعني بيها، فقلت أعيش الدور.. بس قولي بصراحة.. انت كنت ماسكها كدة عشان خايف؟؟ بتعمل احتياطاتك يعني؟؟ منهم لله اللي كانوا السبب.. خلونا كلنا خايفين من بعض.. يلا يا باشا صباحك فل إن شاء الله..

منقول